Шәрипованың күңел хисләре тулып ташыган көннәре – туксан ел гомер итү – ул кыр аша йөгереп чыгу түгел шул
Моннан бик еракта калган 1929 елның кышында алты балалы гаиләдә дөньяга килгән кечкенә Заһидәне, әлбәттә, тормыш иркәләп үстерми. Кызчыкның өлкән агалары фронтка чыгып китә һәм кире әйләнеп кайтмый. Җиде сыйныф белем алырга өлергән үсмерне нужа бабай 1943 елда колхоз эшенә куып чыгара. Авылда калган хатыннар һәм картлар белән беррәттән фронт өчен тырышып эшләгән Заһидәне кырчылык тармагындагы авыр эш тәрбияли, чыныктыра, хак юлдан атларга өйрәтә. 1951 елда авылның затлы ир-егетләрнең берсе булган Нәсим Шәрипов белән гаилә корып, бер-бер артлы дүрт бала табып үстергән ана улларын һәм кызларын да үзләре үрнәгендә – хезмәт сөеп яшәргә өйрәтә.
Тыл хезмәтчәне Заһидә Гомәр кызы Шәрипованы гомер бәйрәме белән район башлыгы урынбасары вазифаларын вакытлыча башкаручы Гүзәлия Фәхертдинова, район ветераннар советы рәисе Зоя Глушкова, Бәйрәкә авыл җирлеге башлыгы Альбина Әхмәтшина, башлангыч ветераннар оешмасы җитәкчесе Әлфия Хаҗиева котдады. Чал чәчле ана бу көнне Россия Федерациясе Президенты Владимир Путиннан да адреслы котлау хаты кабул итте.