Бүген Кукмара шәһәрендә яшәүче тыл ветераны Мөнәвәрә Гайнетдинованың 90 яшьлек юбилее. Туган көн иясен район башлыгы Сергей Димитриев тәбрикләп, аңа чәчәк бәйләме, Россия Президенты Владимир Путинның котлау открыткасын, үзенең Рәхмәт хатын һәм истәлек бүләге тапшырды.
Шулай ук юбилярны котларга район үзәк дәваханәсенең баш табибы Равил Хәлиев, район социаль яклау бүлеге начальнигы Светлана Җамалиевалар да килгән иде.
Мөнәвәрә апа тормыш иптәше Гайфи абый белән дүрт бала тәрбияләп үстергәннәр. Кызганычка каршы, бер кызлары якты дөньяда юк икән инде. Бүгенге көндә ветеранны кызы Сания апа тәрбияли.
-Әни озак еллар район үзәк дәваханәсендә санитар булып эшләп, 65 яшендә лаеклы ялга чыкты, - дип сөйли Сания апа. – Әле бүгенге көнгәчә тик торуны белмәде. Бакчаларны да карап, тәртипләп торды. Соңгы вакытта гына сәламәтлеге какшап китте.
Юбиляр якыннарының игътибарын, хөрмәтен тоеп яши. Аның алты оныгы һәм тугыз оныкчыгы бар икән.
