Җиңү бәйрәме алдыннан Әгерҗе районының барлык мәктәпләрендә һәм балалар китапханәсендә “Балаларга сугыш турында укыйбыз” акциясе узды. Төрле оешма-учреждение җитәкчеләре, белгечләр балалар белән сугыш турында әңгәмә кору, аларга язучыларның әсәрләрен уку өчен мәктәпләргә килделәр.
Россия күләмендә узучы әлеге чарага әгерҗелеләр дүртенче тапкыр кушылдылар. Акцияне оештыручылар – балалар китапханәсе хезмәткәрләре.
Район мәдәният, архив бүлекләре җитәкчеләре Марс Гатауллин, Марина Романова, мәдәният бүлеге методисты Оксана Михайлова, “Әгерҗе радиосы” директоры Гөлия Закирова 1нче гимназия укучылары белән очраштылар.
– Без балалар белән бу сугышның ни өчен Бөек Ватан сугышы дип аталуы турында сөйләштек. Аннары мин Михаил Зощенконың “Храбрые дети” хикәясен укыдым, – диде Марина Романова.
– Әлеге акциядә ел саен катнашам. Чыгышларымны гел татар телендә әзерлим. Үзебезнең район язучыларының һәм шагыйрьләренең әсәрләрен укыйм. Быел сугыш турында әңгәмә алып барганнан соң җирле шагыйрәләр Әлфирә Низамова һәм Асия Корбангалиева шигырьләрен укыдым, – диде Гөлия Закирова.
Үзәкләштерелгән китапханәләр системасының балалар белән эшләү буенча директор урынбасары Лилия Акбашева әлеге акциянең елдан-ел популярлаша баруына сөенүен белдерде.
Балалар китапханәсендә узган чарага 4нче мәктәпнең 1а сыйныф укучылары килде. Китапханәче Резидә Закирова аларга Виктор Драгунскиның “Арбузный переулок“ хикәясен укыды.