Көчек авылында яшәүче хезмәт һәм тыл ветераны Миневафирә Гыймазетдиновага 90 яшь тулды.
Тауҗамал авылында дөньяга килгән кыз гаиләдәге дүрт баланың иң өлкәне була. Әнисе һәм энеләре Зиннур, Бәгъзәнур белән гаилә башлыгын сугышка озатып калалар. Ул фронтка киткәч туган энесе Ниязыйга бер тапкыр да “әти” сүзен әйтү насыйп булмый: гаилә башлыгы ил азатлыгы өчен яу кырында ятып кала. Миневафирәнең балачагы сугыш чоры балалары җилкәсенә төшкән авырлыклардан гыйбарәт.
- Ил азатлыгы өчен көрәш барган елларда иртә таңнан торып фронт өчен бәрәнге киптергән, 17 яшемнән урман кискән чаклар бер дә онытылмый, - дип тормышы турында татар әбиләренә хас тыйнаклык белән сөйли Ак әби.
Зур сабырлык һәм тырышлык кебек сыйфатлар, һәрчак нидер эшләп тору гадәте аны кечкенәдән үк озата килгән. Көчек егете Минемулла белән гаилә корып биредә яши башлагач та Миневафирәның тырышлыгына, уңганлыгына, чисталыгына сокланалар. Тәртип, пөхтәлек яратучы Миневафирәне колхоз идарәсенә техничка булып эшләргә чыкыралар. Бу эшен лаеклы ялга чыккач та ун еллап дәвам итә хезмәт ветераны.
Гомер көзе бик бәхетле Миневафирә апаның. Җәмәгате белән төзегән киң-иркен йортында кичерә. Өч энесенең, аларның балаларының матур яшәүләренә шатлана. Ил-көнгә лаек кыз һәм ул үстерәләре белән горурлана. Туган авылы Көчектә төпләнеп калган улы Нурулла Гыймазетдинов – бөтен райнга билгеле алдынгы комбайнчы. Улы һәм Ижауда гомер кичерүче кызы Алсу, биш оныгы һәм өч оныкчыгы ныклы терәге һәм өмете аның.
Туксан яшен тутырса да үзе дә тик торуны белми авыл уңганы. Кышын ишелгалдына кар көзгә кадәр көне бакчада үтә: яшелчәләр үстерә, җиләк-җимеш җыя, чәчәкләргә су сибә. Бәрәңгегә бернинди химикат сиптерми: көн саен колорадо коңгызларын үзе җыя. “Бакчасында бер чүп тә үстерми. Гомумән, аның бер минут та тик торганын күрмәссең", д”п соклана хәзер дә авылдашлары.
Ил-көн яңалыкларыннан да хәбәрдар ул. Күзлек кимичә генә “Әгерҗе хәбәрләре”н укый. Ак күңелле әбекәй дини китапларны да кулына еш ала. Бөек Җиңүнең 75 еллык бәйрәмендә зурлауларына да бик рәхмәтле ул. Олуг юбилее көнендә ил җитәкчеләре котлавын һәм район башлыгы Азат Вәлиевның бүләген тапшырган аның урынбасары ришат Нурисламовка һәм Көчек авыл җирлеге башлыгы Рөстәм Нурмөхәммәтовка да иң изге теләкләрен җиткерде.
Асия Корбангалиева
