28 апрель көнне Ринат Галеев исемендәге Сөләй урта гомуми белем бирү мәктәбендә “Авылларыбыз тарихын киләчәк буынга тапшыру" дигән темага укучыларның зональ фәнни-гамәли конференциясе булып узды. Конференциягә төбәк тарихын өйрәнүче галимнәр, журналистлар, мәртәбәле кунаклар чакырылган иде. Алар арасында районыбызның “Туган як клубы” тарихчылары: Замалеева Гөлия Набиулла кызы, Хәсәнҗанова Клара Әхмәт кызы,Харрасова Эльвира Фәрид кызы, Ямаева Әлфия Фәрит кызы, Вәлиуллин Минсәгыйт Зәйнулла улы, Хамидуллина Дәлия Әнис кызы, Әхмәтҗанов Ильдар Зөфәр улы, Шайхетдинова Гөлгенә Әхмәтвәли кызы - Шарлама авылы, төбәкне өйрәнүче авылдашларыбыз бар иде.
Тарих дәресләрендә укучылар белән Гарәп хәлифәлеге илләрен, Бөек француз революциясен генә түгел, ә төбәгебезнең тарихын да өйрәнергә тиешбез. Үз төбәгенең тарихын белү - һәр кешенең изге бурычы. Конференциягә укучылар тырышып әзерләнделәр. Һәр чыгыш үзенчәлекле, тарихи фактларга нигезләнгән, кызыклы иде. Конференциядә "Авыл тарихында Бөек Ватан сугышы" темасы буенча да укучыларыбыз чыгыш ясады. 8 нче сыйныф укучысы Иванова Ләйсән авылдашыбыз Советлар Союзы Герое Мотыйк Әхмәтҗан улы Әхмәдуллин эзләре буенча виртуаль сәяхәт әзерләде. Килгән кунакларның чыгышы да үзенчәлекле, тирән эчтәлекле, укучыларда кызыксыну уята алырлык булды. Конференция нәтиҗәләр ясау, түгәрәк өстәл артында сөйләшү белән тәмамланды.
Конференцияне мәктәп җитәкчелеге ярдәме белән тарих укытучысы, музей җитәкчесе Гатауллина Гөлнара Әнвәр кызы оештырды. Укытучылар, укучылар, хезмәткәрләр дә чарада актив катнашты.
Гатауллина Гөлнара Әнвәр кызы,
Татарстан Республикасы Әлмәт муниципаль районы муниципаль бюджет гомуми белем учреждениесе “Галеев Р.Г. исемендәге Сөләй урта гомуми белем мәктәбе”нең
тарих һәм җәмгыять белеме укытучысы