Сугыш һәм хезмәт ветераны Камалова (Мәдиярова) Фәезкамәр Мөхәммәтдин кызы, 1920 елда Сарман районы Иске Кәшер авылында туган. 7 классны тәмамлагач Казан шәһәренә китә. Вахитов исемендәге заводның рабфагына укырга керә. Сугыш башлангач,Тархан районына окоп казырга җибәрелә. 1942 елда фронтка китә. 1782 нче зенит-артеллерия полкында элемтәче булып хезмәт итә. Мәскәүне саклауда катнаша. Аннары Краков шәһәре янына җибәрелә. –“Берүзең дошман тылына кереп китәсең. Элемтә өзелгән урынны табып ялгарга кирәк. 3-4 көн бер ризык капмый йоргән чаклар булды. Бервакыт элемтә өзелгән урын дошман штабы янында булып чыкты. Шул урыннан тегеләр үзләре ялгап команда биреп ятканнар.Курку юк монда, я син, я ул. Өзелгән урынны ялгап, тиз генә үзебезнекеләргә хәбәр иттем. Дошман штабы шунда ук күккә очты. Чак исән калдым”,- бу Фәезкамәр апа истәлекләреннән. 1945 елда сугыштан кайта, Казан шәһәрендә яшәп, Вахитов исемендәге сабын заводында хисапчы булып эшли. Бик күп орден, медальләр белән бүләкләнә. Вафат, Казан шәһәрендә җирләнгән.