ДЕРГУНОВ ЛАЗАРЬ ВАСИЛЬЕВИЧ
Дергуно́в Лазарь Васильевич (7.2.1907, Сембер губернасы, Буа өязе, хәзерге Чүпрәле районы Яңа Үби авылы - 23.12.1974, шунда ук), авыл хуҗалыгы предприятиесе җитәкчесе, Социалистик Хезмәт Герое (1948).
Тәрҗемәи хәле
Бөек Ватан сугышында катнаша. 1940-41, 1943-60 елларда Чүпрәле районының Чапаев исемендәге колхозы рәисе. Дергунов җитәкләгән елларда колхоз авыл хуҗалыгы культураларының югары уңышы белән аерылып тора, хезмәтне оештыруда алдынгы формалар кертелә, терлекчелек һәм ярдәмче производствоның материаль-техник базасы ныгытыла. Колхоз берничә тапкыр Бөтенсоюз авыл хуҗалыгы күргәзмәсендә катнаша. 1955-63 елларда ТАССР Югары Совет депутаты.
Мактаулы исемнәре һәм бүләкләүләре
Ленин ордены, Хезмәт Кызыл Байрагы, «Почёт билгесе» орденнары, медальләр, шул исәптән СССР Халык хуҗалыгы казанышлары күргәзмәсенең (ВДНХ) көмеш медале белән бүләкләнә.