10 апрельдән 7 майга кадәр arskmedia.com сайтында сугыш һәм тыл ветераннарының, сугыш чоры балаларының оныклары ветераннар яки аларның ядкәрьләре (орден–медальләре, истәлекле фотолары, бүләкләү кәгазьләре һ.б.) белән төшкән фотоларга һәм фотога бәйле язмаларга «Жиңү варислары» конкурсы игълан иткән идек. Кыска гына вакыт эчендә конкурска 28 эш килде. Арада бик күп тавыш җыючылар да булды, ләкин һәр хезмәт конкурс шартларына туры килеп бетмәде. Тавыш бирү һәм махсус комиссия тарафыннан түбәндәге җиңүчеләр билгеләнде: 1 урында Вәкыя Гыйндуллина (оныкчыгы Азалия Хәбибуллина), 2 урында Канәфи Гарипов (оныгы Әлфия Гарипова), 3 урында Гыймадиев Фәрзи (оныкчыгы Гыйниатуллин Арслан) һәм махсус призга лаек булган Илсаф Галәветдинов (бабайсы Әсхәт Әхмәдуллин турындагы шигыре өчен). Бәйге шартларын үтәмәсә дә, иң күп тавыш җыйган Түбән Мәтәскәдән Әдилә Нәбиуллинага (бабайсы Габделхәй Гарифуллин) редакциябезнең махсус бүләге тапшырылачак.
Барлык катнашучыларга да зур рәхмәтебезне җиткерәбез. Без, укучыларыбызга, җиңүчеләрнең язмаларын һәм фотосурәтләрен газета битләрендә урнаштырырга вәгъдә бирдек һәм бүгенге санда вәгъдәбезне үтибез.
9 май көнне, “Арча кичләре”ндә җиңүчеләрне бүләкләү тантанасы була. Аларны редакциябезнең һәм иганәчебез «АрскМед» медицина үзәгенең бүләкләре, грамоталар көтә. Тамашачыларга тагын бер сюрприз булачак: барлык катнашучыларның да эшләре сәхнә янындагы экранда күрсәтеләчәк.
ИСКӘРМӘ. Хөрмәтле җиңүчеләр, әлеге язманы укыгач, танышып чыгуыгызны белдереп безгә «В контакте»дагы «Арча хәбәрләре»нә хәбәр юлласагыз иде. Сезне 9 май кич Арчадагы «Радуга» сәүдә үзәге каршында булачак «Арча кичләре»ндә көтеп калабыз. Бәйрәм 7 дә башлана, бүләкләр тапшыру 8 дә булачак.
P.S. Газетабыз тиздән 3 яшькә кадәрле балалар арасында яңа конкурска старт бирәчәк. Сайтыбызны карап барырга онытмагыз. Җәйнең ямьле, матур айларында балаларыгызның үзенгчәлекле хәрәкәтләрен, шөгыльләрен, өлкәннәр янында булышырга теләп әвәрә килүләрен һ.б. эш–гамәлләрен фотога төшереп безгә юллагыз. Фотосурәтләрне бүгеннән үк җибәрә башласагыз да була. Баланың исем–фамилиясен, әтисенең исемен, туган җирен, яшен күрсәтергә онытмагыз. Фотосурәтләр “В контакте” социаль челтәрендәге “Арча хәбәрләре” бите һәм arvestnik@yandex.ru электрон адресы буенча кабул ителә.
Гыйндуллина Вакыя Гыйндулла кызы
Дәү әниемнең әнисе — дәү әбием Гыйндуллина Вакыя Гыйндулла кызы – тыл ветераны һәм сугыш чоры баласы. Бөек Ватан сугышы башланганда аңа, нәкъ минем кебек, 10 яшь булган. “ Безнең балачакны сугыш урлады, сезгә тыныч тормышта, әти–әни тигезлегендә яшәргә насыйп булсын”, – ди ул. 10 яшьлек бала гына булса да, туган илен саклауга, Җиңү көнен якынайтуга үзеннән зур өлеш керткән әбием. Уфалла арбасы тартып тирес түгүләр, амбарда молотилкада эшләүләр, төн утырып фронт өчен бияләйләр бәйләү, урак уру һ.б. бик күп эшләр тылда калган хатын–кызлар һәм балалар җилкәсенә төшкән. Дәү әбием безгә: ” Без күргәнне күрергә язмасын иде сезгә. Сугышлар булмасын, тынычлыкта яшәгез. Белем алырга тырышыгыз. Кечкенәдән эшкә өйрәнегез, эш белгән кеше, беркайчан да югалмый”, – дип өйрәтә. Без – оныкчыклары, дәү әбиебез белән бик горурланабыз.
Хәбибуллина Азалия Илнур кызы, Иске Төрнәле авылы (Арча 5 нче номерлы гимназиясе укучысы).
Гарипов Канәфи Гарифулла улы
Минем бабаем Гарипов Канәфи Гарифулла улы 1932 нче елда дөньяга килә. Кеченәдән эшкә — чабата ясарга өйрәнә. Беренче сыйныфны тәмамлагач, йөк өстендә тора. 1946 елны ул аяк киемнәре остаханәсенә эшкә керә. Аннан соң колхозда ат сбруйлары, ыңгырчаклары, камыт төзәтеп тора. Урман кисү, ашлык чыгару бабайны да читләтеп үтми. 1972 нче елда “Ярыш” колхозына рәис итеп билгеләнә. Авылыбызда беренчеләрдән булып виноград үстерү серләренә дә төшенде бабам. Үзлегеннән намаз укырга өйрәнде. 10 ел дәвамында авылда мулла булып торды. Әбиебез Рафилә белән инде 55 ел тату гомер итәләр.Мин Канәфи бабаем белән горурланам. Әлеге фоторәсемгә бабай Президентыз Рөстәм Миңнеханов белән очрашуга баргач төшкән. Аңа “ Җиңүгә 70 ел” юбилей медале тапшырганнар .
Гарипова Әлфия Тәлгать кызы, Мөндеш башлангыч мәктәбенең 2 сыйныф укучысы.
Гыймадиев Фәрзи Гыймади улы
Дәү бабаем Гыймадиев Фәрзи Гыймади улы. Ул Бөек Ватан сугышы һәм мәгариф ветераны.
1941 нче елны ул үз теләге белән фронтка китә. Сталинград, Смоленск, Орша шәһәрләре өчен барган сугышларда гаять зур батырлыклар күрсәтә. Өч тапкыр каты яралана. Соңгы авыр ярасыннан соң 1944 нче елда туган ягына кайта. Дәү бабам сугыштан орден-медалләр белән генә түгел, тәнендә сугышның ачы истәлеге булып калган 5 кыйпылчык та алып кайта. Берсе аның Балтач районы Чепья музеенда уникаль экспонат булып саклана. Безнең дәү бабабыз хөрмәтле шәхес. Без, аның балалары, оныклары, оныкчыклары, аның батырлыгы, тырышлыгы белән, ул безнең якыныбыз булуы белән горурланабыз! Ул һәрвакыт безнең очен үрнәк булачак.
Арслан Гыйниатуллин, Арча.
Әхмәдуллин Әсхәт
Минем бабам — Әхмәдуллин Әсхәт
Үгез-Елга дигән авылдан.
Илебезгә фашист басып кергәч,
Бабам да сугышка алынган.
Унтугызы тулар-тулмас килеш
Командир да булган яшь егет.
Минометтан снарядлар аткан,
Днепрны кичкән ул җиңеп.
Кырык дүрттә авыр яраланып
Кайткан бабам туган ягына.
Күкрәгендә орден, медальләре
Батырлыкка бирелгән аңа.
Горурланып яшим бабам белән,
Батыр булуына сокланам.
Сугыш ядкарьләрен кадерләп
Мин еш кына кулыма алам.
Илсаф Галәветдинов, Апаз урта мәктәбе.