Бөек Җиңүнең 71 еллыгы уңаеннан Апас районының Мазиково балалар бакчасында Ленинград блокадасын кичергән Сафина Сария апа һәм тыл ветераны, сугыш ветеранының тол хатыны 92 яшьлек Хөснетдинова Наҗия әби белән очрашу булды.Балалар, Сария апаның немец самолетлары шәһәрне бомбага тотканда, подвалда ничек качып ятуларын, үзләренең бер сынык ипигә тилмереп яшәүләрен бик зур кызыксыну белән тыңладылар. Сария апаның балачагы белән үзләренең балачагын чагыштырып карадылар. Ә Наҗия әби сугыш чорында авылдагы хезмәт, тормыш белән таныштырды. Наҗия әбигә дә ул чорда бик күп авырлыклар күрергә туры килә. Ул 18 яшеннән колхозда бригадир булып та хезмәт итә, төрле орден, медальләр белән бүләкләнә.Балалар аларның медальләрен тотып-тотып карадылар һәм бүгенге тыныч тормыш күңелле балачакларының җиңел генә бирелмәгәнен аңларга тырыштылар, олы кунакларга үзләренең өйрәнгән шигыйрь, җырларын бүләк иттеләр. Әлеге очрашу бик зур тәрбия чарасы булды.
