6 май көнне Пөшәңгәр башлангыч-мәктәп балалар бакчасында тыл ветераннары һәм сугыш чоры балалары белән очрашу кичәсе оештырылды. Кичә “Урак өсте хатирәсе” исемле күренеш белән башланып китте. Анда ак яулыклы әби оныгына сугыш еллары, әтисенең сугышта һәлак булуы, әниләре белән колхоз эшендә эшләүләре, урак урулары турында сөйләде. Әбинең урак өсте хатирәсе 3 сыйныф кызлары тарафыннан сәхнәгә куелды һәм кичәгә килгән өлкәннәрне шул елларга алып кайтты. Кичә “Ватан” күмәк хуҗалыгы җитәкчесе Әхмәтов Мансур Готыф улының, Апаз авыл җирлеге башлыгы Садыйков Ренат Шамил улының сугыш елларының бар авырлыгын үз җилкәсендә татыган тыл ветераннары һәм сугыш чоры балаларын тәбрикләүләре белән дәвам итте. Балалар бакчасы нәниләре, укучыларыбыз, укытучылар әби-бабайларга матур җырлар, дәртле биюләр, күңелгә үтеп керерлек нәфис сүзләр бүләк иттеләр. Өлкәннәр исә әтиләрен, абыйларын сугышка озаткан мизгелләрне искә алдылар, шул чорлардагы ачлык, ялангачлык, ятимлек, авыр хезмәт турында сөйләделәр. Тыл ветераннары да язгы юлдан симәнә ташу, җәйге эсседә урак уру, үгезләр җигеп чәчү чәчү, ерак районнарга барып урман кисү, окоп казу кебек эшләр, аларның авырлыгы хакында искә төшерделәр. Бәйрәм кичәсе табын янында төгәлләнде.
Бөек Җиңү көне алдыннан үткәрелгән бу истәлекле очрашу өлкәннәргә чордашлары белән күрешеп сөйләшергә, яшь буыннарның ихтирамын һәм хөрмәтен тоярга, рәхмәт сүзләре ишетергә мөмкинлек бирде. Балаларга, укучыларга Бөек Ватан сугышы китергән коточкыч авырлыклар хакында белергә ярдәм итте.
Галәветдинова Рания Әхтәмовна
Пөшәңгәр башлангыч мәктәп-балалар
бакчасы педагог-оештыручысы
