Бөек Ватан сугышында батырларча һәлак булганнарның якты истәлеген саклау һәм бүгенге көндә исән ветераннарга һәръяклап игътибар һәм ихтирам күрсәтү –безнең әхлакый бурычыбыз. Кызганычка каршы, арабызда бу сугышны үз җилкәләрендә татыган, аның бар авырлыкларын кичергән ветераннарыбыз бик аз калды – районда нибары 12 кеше. Быел Җиңүнең 75нче язын парад яки халык җыены рәвешендә үткәрү күздә тотылмый.Бу хакта Татарстанның Премьер-министры урынбасары Ләйлә Фазлыева хәбәр итте.
Әмма бу хәбәр 9 Май – Җиңү көне бөтенләй үткәрелми дигән сүз түгел. Һәйкәлләргә һәм мемориалларга район һәм җирлек җитәкчелек тарафыннан чәчәкләр салу тантанасы, һичшиксез, булачак. Шарт берәү генә: чарада халык саны мөмкин кадәр азрак булырга тиеш.
Актаныш районы авылларында бүгенге көндә барлыгы 78 һәйкәл исәпләнә, шуларның күбесендә диярлек ремонт эшләре уздырырга кирәк. Бу - һәйкәлләрне буяу, исемлекләрен яңарту, фундаметларын ремонтлау, коймаларын яңарту кебек эшләр. Район башлыгы урынбасары Рәйхан Флүс кызы әлеге чараларны 25 апрельгә кадәр башкарып чыгарга кирәклеген ассызыклады.
Шулай ук районда соңгы елларда гына сафка баскан һәйкәлләр дә бар. Алар Аккүз, Такталачык, Күҗәкә, Иске Сәфәр, Әтәс, Куян авылларында. Авыл халкына газиз улларының батырлыгын искәртеп торган һәйкәлләр, нигездә, үзара салым акчаларына төзекләндерелә, яңартыла. Бу изге эштә иганәчеләр дә ярдәм кулы суза. Шундый олы йөрәкле иганәчеләрнең берсе – Яр Чаллы шәһәрендә гомер кичерүче Фәнис Газетдинов 2019 елда Ватан өчен барган сугышта ятып калган якташлары истәлегенә Куян авылында яңа һәйкәлне сафка бастыруда матди ярдәм күрсәтте.
