Минем Ерак бабам (әниемнең әнисенең әтисе) Бөек Ватан сугышында катнашкан. Ул 1921нче елның 15нче февралендә Лаеш районы Хәерби авылында туып үскән.
1941нче елның сентябрендә ул сугышка алына һәм 1293нче укчылар полкы белән фронтка китә. Зариф бабам разведчик итеп билгеләнә һәм Тула шәһәренә таба барган сугышларда разведчик була.
1942нче елның августындаТула өлкәсендәге Луковка авылы өчен барган сугышта каты яралана, Пермь шәһәренең 3131нче номерлы госпиталенә озатыла.
1942нче елның 31нче октябренә кадәр госпитальдә дәвалангач, Ерак бабамны туган ягына кайтарып җибәрәләр.
Зариф бабай гомере буе туган авылы Хәербидә яши. Сугыштан кайткач, 1943 – 1974нче елларда ул “Алга” колхозында механизатор булып эшли. 1975нче елда “Хәерби” совхозы оеша, Ерак бабай анда машиналар паркында слесарь була һәм пенсиягә кадәр шунда эшли.
1981нче елның 13нче февралендә ул лаеклы ялга чыга, ә 1982нче елның 30нчы февралендә аны яхшы эшләгәне өчен “Хезмәт ветераны” медале белән бүләклиләр.
Ерак бабам Ерак әбием Сәлимә белән 11 бала тәрбияләп үстергәннәр.
Зариф бабай 1992нче елда вафат булган. Ул сугышны үз күзләре белән күргән, катнашкан кеше, ләкин сугыш турында бер дә сөйләргә яратмаган. Мин аның белән бик горурланам.
Күгебез аяз, илебез тыныч булсын!
Нәфисә Галиева, Әлмәт шәһәре
Ризаэддин Фәхреддин исемендәге
1 нче гимназиянең 2 нче сыйныф укучысы
