Бөек Җиңүнең 80 еллыгы уңаеннан Әлмәт җирлегендә «Хәтер бакчасы» акциясенә старт бирелде.
Акция кысаларында теләге булган һәркем Геройлар истәлегенә агач утырта ала. Әлеге чара гади вакыйга гына түгел, ул ата-бабаларыбыз батырлыгын, ил тарихын һәм һәр гаилә тарихын саклап калу өчен яңа традициянең башлангычы.
Узган атнада гына да 100 дән артык кеше 15 мең имән һәм корычагач утыртты.
- Үзеңнән соң истәлек калдырырга теләсәң - агач утырт, диләр халыкта. Бу хак сүзләр. Яшел һәйкәлләр буыннар бәйләнешен генә сакламый, алар туган җиребезне яшелләндерә, һавабызны да чистарта бит әле, шул турыда да онытмасак иде, - диде Экология һәм төзекләндерү департаменты директоры Марат Юлдашев.
Аның сүзләренә өстәп шуны да искәртеп узасы килә, утырткан үсентеләребезне даими кайгыртып, вакытында төпләрен йомшартып, су сибеп торырга да онытмасак иде.
