16 февраль көнне бөек герой-шагыйрь Муса Җәлилнең 110-еллыгы уңаеннан Апас туган якны өйрәнү музеенда гаять зур тантаналы чара узды.
Чарада катнашучылар: Даимә Тимеркаева (пионер хәрәкәте активисты һәм китапханә хезмәте ветераны, 1972 нче елда Бишкек (Фрунзе) шәһәрендә Муса Җәлилнең бертуган абыйсы Ибраһим Җәлилов белән очрашкан шәхес буларак районыбыз горурлыгы), Хәмит Мингалиев (ТР авыл хуҗалыгының атказанган хезмәткәре, әтисе Минвәли Мингалиев 1930-32 елларда Мәскәүдә Муса Җәлил белән “Яшь эшче” газетасында бергә хезмәт иткән шәхес буларак танылган), музей каршында эшләп килүче "Тынгысызлар" фольклор ансамбле (М.Җәлилгә 100 ел тулу уңаеннан оештырылган), батырлык күрсәткән Җәлилчеләр арасында Абдулла Алишның бертуган апасы Закирәнең улы, бөтен иҗат эшен Апас районындагы шәхесләргә багышлаган, республикакүләм “Бәллүр каләм” конкурсының 3 мәртәбә бүләк иясе, Татарстанның атказанган мәдәният хезмәткәре Азат Сункишев.
Чараның төп кунаклары – Апас аграр көллияте студентлары, Ветераннар Советы әгъзалары үзешчән сәнгатьтә актив катнашучылар һ.б.
Чараның игътибар үзәгендә Җәлил – Җәлилчеләрнең Апас кешеләре белән бәйләнеше булган вакыйгалардан кызыклы экспозиция иде. Шәхси әйберләр белән беррәттән истәлекле фотолар, архив документлары, шулай ук Муса Җәлил эшләгән “Яшь эшче” газетасының типография хәрефләре тамашачыларның игътибарын аеруча үзенә тартты. Җәлил белән Апас кешеләренең бәйләнешле туганнары, үзләренең чыгышларында хатирәләрен бүлештеләр, шигырьләрен йөрәккә үтәрлек итеп сөйләделәр. Район хакимияте тарафыннан киң яклау тапкан “Моабит дәфтәре” монументаль һәйкәлгә тере чәчәкләр салынды.
Тамашаны республика “Яңа гасыр”телерадиокомпаниясе, “Хәбәрләр” (“Новости”), “Манзара”; “Апас хәбәрләре” район телекомпаниясе тапшыруларында ачык чагылыш тапты.
