Багыш авылында улы Рашат белән гомер итүче Фәһим ага Фәсхиевкә 94 яшь биреп тә булмый.
Һаман хәрәкәттә, хезмәттә ул. Бөек Ватан сугышы ветераны фронтта картограф булып хезмәт иткән. Бик күп дәүләт бүләкләре, орден-медальләр белән бүләкләнгән. Картлыгында да карандаш-пумаладан аерыла алмый ветеран-фронтовик. Өй диварлары менә шундый үзе ясаган акварель рәсемнәр, портретлар белән тулы. Мәктәптә, клубларда яшьләргә үзе сугышта күргәннәрне бик теләп сөйли, Ватанны якларга һәм яратырга өнди. Агачтан чәчәкләр дә кисеп ясарга ярата ул.
-Авылда мин бизәкләп ясаган тәрәзә яңаклары, капка-кәрнизләрнең исәбен дә белмим инде,- ди ул, уенын-чынын бергә кушып.
Узган шимбәдә Чирмешән авыл җирлеге башлыгы Айрат Зиннәтуллин ветеранның өенә килеп, аны барлык туганнары алдында район хакимияте, ил җитәкчеләре исеменнән Ватанны саклаучылар көне белән котлады һәм бүләкләр тапшырды.
-Фәһим бабай безнең авылның күрке һәм горурлыгы ул. Мәктәптә хезмәт дәресләрендә ул балаларны матурлыкны яратырга өйрәтте. Кадерле тормыш иптәше, инде мәрхүм Асия апа белән бик тәрбияле, эшкә батыр һәм бик тә кешелекле балалар үстерде, матур тормыш үрнәге белән авылдашлары хөрмәтен казанды, - ди авыл җирлеге хезмәткәре Гөлшат Нуретдинова.
