Актаныш районы “Туган як” музеенда ТАССРның атказанган агрономы, Октябрь Революциясе, Хезмәт Кызыл Байрагы, Почет Билгесе, I дәрәҗә Ватан сугышы, Кызыл Йолдыз, Дан орденнары кавалеры, 30 елдан артык “Коммунизмга” колхозында баш агроном булып эшләгән - Мөхәммәтнур Лотфулла улы Исламовның илебез азатлыгы өчен көрәштә күрсәткән батырлыгын һәм туган җирендә авыл хуҗалыгын күтәрүдә куйган хезмәтен олылауга багышланган кичә уза.
“Туган җирнең данлы кешеләре” циклыннан Бөек Җиңүнең 75 еллыгы, Актаныш районы төзелүгә 90 ел тулу уңаеннан уздырылучы әлеге чара 4 март көнне сәгать 10 да башлана.
Мөхәммәтнур Лотфулла улы Исламов 1924 елның 14 июлендә Яңа Җияш (Каратал) авылында туа.
1942 нче елда Бөек Ватан сугышына китә. Хәрби училище тәмамлый. Үзәк, Беренче Белоруссия, Украина фронтларында, Курск дугасында барган бәрелешләрдә катнаша. Наводчик булып хезмәт итә. Җиңүне Чехословакиядә каршылый. Кызыл Йолдыз, Дан, Беренче дәрәҗә Ватан сугышы орденнары, Сугышчан хезмәтләре өчен медале белән бүләкләнә. (Сугыштан соң тапшырылган күпсанлы юбилей бүләкләре әлеге исемлеккә керми). Сугыш тәмамлангач, хәрби хезмәтен Германиядә дәвам итә.
1946 елда туган авылна әйләнеп кайта. Колхозда бригадир булып эшли башлый. Казанда өчьеллык агрономнар мәктәбен тәмамлагач, Сталин исемендәге колхоз рәисе итеп билгеләнә.
Колхозлар эреләндерелгәч, “Коммунизмга” колхозы башлангыч партия оешмасын җитәкли.
30 елдан артык “Коммунизм”га колхозы баш агрономы булып эшли. Җир эшкәртүнең яңа алымнарын кертә. Союз буенча таныла. Югары уңыш үстергәне өчен СССР күләмендә олы мактауга лаек була. Почет Билгесе, Хезмәт Кызыл Байрагы, Октябрь Революциясе орденнары, күп санлы медальләр белән бүләкләнә. КПСС Үзәк комитеты, СССР Министрлар Советы, ВЛКСМ Үзәк комитеты Мактау грамоталары тапшырыла.ТАССРның атказанган агрономы.
Тормыш иптәше Равия белән 5 ул, 2 кыз үстерәләр.
