Арский

Иске Кенәр авылыннан 150ләп кеше сугышка киткән. 74е кире кайтмаган. Мәктәп бакчасында Бөек Ватан сугышында һәлак булганнар истәлегенә һәйкәл ачу тантанасы булды. Анда шушы һәйкәлне булдыруда тырышып йөргән Ташкичү авыл җирлеге башлыгы Фәһим Фәйзуллин катнашты. Һәйкәл чит җирләрдә ятып калган каһарманнарга дога укып ачылды.

9 майда Арча шәһәрендә Бөек Җиңүнең 70 еллыгына багышланган парад һәм митинг булды. Митингта район башкарма комитеты җитәкчесе Илшат Нуриев чыгыш ясады. Россия Федерациясе Пенсия фондының Татарстан Республикасы буенча Идарәсе җитәкчесе Марсель Имамов Татарстан Республикасы Президенты Рөстәм Миннехановның бәйрәм тәбрикләвен җиткерде.

8 майда социаль яклау идарәсе җитәкчесе Илдус Әһлиев Арча шәһәрендә яшәүче Бөек Ватан сугышы ветераны Госман Габдрәхимовка “Җиңү китергән таныш йөзләр” дигән китап тапшырды. Әлеге китап Госман абыйга багышланган.

8 майда Россия Эчке эшләр министрлыгының Арча районы буенча бүлеге җитәкчесе Айдар Баһавиев район эчке эшләр бүлегендә хезмәт итеп лаеклы ялга чыккан, Яңа Кенәр авылында яшәүче Бөек Ватан сугышы ветераны Фәрит Шәмсетдиновны бәйрәм белән котлады, күчтәнәч тапшырды. Яңа Кенәр, Арча зиратларында җирләнгән сугыш ветераннары — эчке эшләр бүлеге хезмәткәрләренең каберләренә чәчәкләр салды.

8 майда Шекә авылында Бөек Ватан сугышында һәлак булган авылдашлар истәлегенә һәйкәл ачу тантанасы булды. Анда район башкарма комитеты җитәкчесе Илшат Нуриев катнашты. — Мондый һәйкәлләр һәр авылда булырга тиеш! — диде район җитәкчесе.

Шәһәрнең үзәк мәйданы Бәйрәмчә бизәлгән демонстрантлар колоннасы Интернационал урамы буйлап Совет мәйданына район халык суды бинасына кадәр түбәндәге тәртиптә юнәлә: Байрак йөртүчеләр. Хәрби комиссариат офицерлары һәм отставкадагы хәрби хезмәт ветераннары. “Мин хәтерлим, горурланам!” акциясендә катнашучылар. “Бөек Җиңүгә – 70 бишле!” конкурс–акция җиңүчеләре. “Мәгариф идарәсе” муниципаль учреждениесе һәм мәгарифнең ведомство учреждениеләре. Арчаның 1нче мәктәбе. Арчаның 2нче мәктәбе. Арчаның 5нче гимназиясе.

Бу көннәрдә Мәскәүдә Кызыл мәй­данда Җиңү Парадының репетицияләре уза.Анда җәяүлеләр дә, техника да, авиация дә катнашачак. Парадта 151 хәр­би техника катнашачагы билгеле. Бу, узган ел белән чагыштырганда, 50 машинага күбрәк. Парад барганда, Кызыл мәйдан өстеннән Җиңүгә 70 ел тулуын символлаштырып, 70 очкыч һәм вертолет узачак. Бу хакта Россиянең Оборона министрлыгыннан хәбәритәләр. Безнең егетләр дә хәрби хезмәттә сынатмый, дәрәҗәләнә. Арча егете Хәмзә Фазыйлов быел Мәскәүдә Кызыл мәйданда парадта катнашачак.

Илебез тарихында иң караңгы сәхифәләрнең берсе – Бөек Ватан сугышы. Миллионлаган солдатлар батырларча башын салган бу афәт гасырлардан гасырларга күчеп хәтерләрдә мәңге саклансын дисәк, без бүген дә уяу булырга тиеш.Сугыш утлары тынуга 70 ел үтсә дә, балачакларын усал аҗдаһа йоткан сабыйлар күңеле әле дә сыкрый. Ватанга булган мәхәббәт, тыныч, бәхетле киләчәккә ышаныч барысыннан көчле булып, Бөек Җиңүгә китерде.Казанбаш һәм Көтек авылыннан 160 кеше сугыш кырыннан әйләнеп кайтмаган.7 нче май көнне биредә авыл уртасындагы һәйкәл янында тантаналы митинг булды.

Кәче төп гомум белем бирү мәктәбендә Бөек Җиңүнең 70 еллыгын каршыларга әзерлек эшләре дәвам итә. Укучылар технология укытучысы Копылова Г. Г. белән бик матур веноклар, чәчәкләр ясадылар, концерт номерлары, сценарий әзерләнде. Ветераннарга чакыру кәгазьләре, котлау открыткалары җибәрелде- диеп хәбәр итә безгә мәктәп коллективы.