Фронтовиклар

1926 елның 15 декабрендә Үргәгарда туган. 17 яше дә тулмаган килеш Армия сафларына мобилизацияләнә. Аның хәрби биографиясе 1943 елда Амур буе хәрби округында 25 нче армия составында башлана. Телефонист, механик-йөртүче белгечлекләре үзләштерә һәм артиллерия бригадасында хезмәт итә. Зөфәр Манчжурия аша үтеп, Кореяның күп кенә шәһәрләрен япон самурайларыннан азат итүдә катнаша. Соңрак Кытай территориясендә урнашып калалар. 1950 елның декабрендә демобилизацияләнә һәм сагынылган туган авылына кайта.

Ибраһим Хәертдин улы Хәйретдинов – сугыш юлларын узган ветераныбыз. Ул Теләнче Тамак авылында комбайнчы булып эшләгән. 1944 елның февралендә армия сафларына алганнар. Ярты ел Уфа шәһәре янында запастагы полкта хәрби өйрәнүләр үткән. Кече сержант званиесендә шул елның октябрендә сугышка кергән. 82 миллиметрлы миномет расчеты командиры итеп билгелиләр аны. I Украина фронтында сугыш чирканчыгы алган, каты бәрелешләрдә катнашкан. 1945 елның мартында, Берлинга 90 километр кала, снаряд кыйпылчыгы тиеп яралана ул.

Хәйретдинов Мөҗип Хәйретдин улы 1903 елда Казан губернасының Спас өязе Карамалы авылында (хәзер ТР Әлки районы) туган. Бөек Ватан сугышы ветераны. 1941 елда фронтка алына. Калинин фронтында барган сугышларда катнаша.1941 елда яраланып алты ай госпитальдә дәвалана. Сугыштан соң туган авылына кайта, “Кызыл байрак” колхозында төрле эштә эшли. 1989 елда вафат.

Хәйруллин Ибәтулла Хәйрулла улы 1908 елда Казан губернасының Спас өязе Базарлы Матак авылында (хәзер ТР Әлки районы) туган. Бөек Ватан сугышы ветераны. ТАССРның Әлки район хәрби комиссариатыннан алына. 1942 елда һәлак була.