Галерея

Хафизова Шәмсеҗиһан Мәҗит кызы 1925 елның 2 сентябрендә Сарман районы Иске Имән авылында туган. Яшьли кул арасына керә, йорт эшләрен башкару белән бергә энеләрен дә карау Шәмсеҗиһан апа өстендә була. Бөек Ватан сугышы чорында кайда кушсалар, шунда: Любян урманнарын кисүдә, Чугунскида юл төзелешендә, колхозда хезмәт куя. Гомере буе колхозда эшли, гектарлап чөгендер эшкәртә, сарыклар карый, каравылда да тора. Зарлануны белми Шәмсеҗиһан апа, “эшләдек тә, эшләдек инде”,- дию белән чикләнә.

Хисмәтов Асадулла Самигулла улы 1924 елда Казан губернасының Спас өязе Түбән Әлки авылында (хәзер ТР Әлки районы) туган. Бөек Ватан сугышы ветераны.1942 елда ТАССРның Кузнечиха район хәрби комиссариатыннан алына.

Күп балалы гаиләдә баш бала булып туган Галия Хәмит кызының балачагы сугыш алды елларында туган яшьтәшләренекеннән аерылмый, диярлек. Җиденче сыйныфны тәмамлауга, эшкә керә ул: колхозда да эшли, урманын да кисә, Горький якларында торф та чыгара. Колхозда кая кушалар, шунда эшли Галия апа. Гектарлап чөгендер утау, сарык йоны алу, колхоз кишерен утау, алуда зурлар белән бертигез эшләргә туры килә аңа. Татар Карамалысы авылы егете, Бөек Ватан сугышы ветераны Габдулла абый белән гаилә кора, өч бала таба Галия апа. Кызганыч, баш балалары, бала чакта ук авырып, вафат була.

Тәгъзимә апа Мостафин авылында туып-үсә. Гаиләдәге җиде баланың икенчесе була ул. Әнисе мәктәптә хезмәткәр булып эшли. Сугышка киткән әтисе Нуриәхмәттән бер генә хат килеп кала, балалары ятим үсә. Мәктәп елларында ук колхоз эшенә йөриләр, басуда, фермада эшлиләр. Ашарга ризыгы, кияргә киеме юк чаклар. Азрак үсә төшкәч, урман кисәргә дә йөртәләр. Гомере буе “Петровский” совхозында эшләп, лаеклы ялга чыга. Авылдашы Шәрипҗан белән гаилә корып, дүрт бала үстерәләр. Икесе дә бик тырыш булалар, үз гомерләрендә өч йорт кына төзиләр. Балалары да үзләренә ошап, тырыш булалар.