Яңалыклар

Бөек Ватан сугышында катнашкан, авыр тыл хезмәтен үз җилкәсендә татыган ветераннарыбызның саны елдан-ел кими бара. Ташчишмә авылында да алар нибары икәү генә калды. Ул елларның авырлыкларын үз җилкәсендә татыган тыл ветераннары Хатирә апа Гарипованы, Борхан абый Сабировны Бөек Җиңүнең 80 еллыгы белән искә алдык. Илләребез тыныч, күкләребез аяз булсын, саулык-сәләмәтлек, озын гомер телибез. Алар моңа лаек. Аларның рухи ныклыгы, түземлелеге Бөек Җиңү китерде.

Әлмәттә Бөек Ватан сугышында катнашучыларның йортларындагы исем такталары яңартылды. Фасадларда өстәмә юл барлыкка килде: "Әлмәт районының Мактаулы гражданины". Яңа табличкалар Людмила Березова, Николай Федотов, Миңниса Сабирова һәм Анатолий Соколов йортларын бизиләр инде.

Әлмәт татар дәүләт драма театрында Бөек Җиңүнең 80 еллыгына багышлап, Халык язучысы Мәхәммәт Мәһдиевнең «Кеше китә - җыры кала» әсәренә нигезләнеп төшерелгән телесериалның презентациясе булды. Фильмны Әлмәттә күрсәтелүнең җитди сәбәбе - төп рольләрдә безнең театр артисты Ләйсән Әхмәдиева һәм Татарстанның атказанган артисты Илсур Хәертдинов уйный. Алардан тыш, безнекеләр катнаша. Әлеге фильм – ул безнең тарихыбыз. Аны сөйләп кенә булмый, карарга кирәк.

3 нче Белоруссия фронты гаскәрләре 1945 елның 6 апрелендә Кенигсберг һөҗүм операциясен башлыйлар, аның төп максаты дошман группировкасын юк итү һәм Кенигсберг шәһәр-крепостен алу була. Бу зур шәһәрне алу-Бөек Ватан сугышы тарихында иң якты битләрнең берсе. Кызыл Армия гаскәрләре алдында немецларның берничә оборона линиясен, фортларын, дотларын һәм дзотларын, өстәвенә җир асты складларын һәм арсеналларын яулап алу бурычы тора иде. Маршал А.Василевскийның нияте төньяктан һәм көньяктан көчле ударлар белән дошман көчләрен тар-мар итү һәм штурм белән шәһәрне алу иде.